Það tókst!

Fimm sekúnda vald kjósenda í kjörklefanum skilaði sér ágætlega.  Felldi stjórnarmeirihlutann, hafnaði formanni Framsóknarflokksins sem líka er viðskipta-og iðnaðarráðherra og að sama skapi komst umhverfisráðherra þeirra ekki inn.   Kjósendur vilja aðra mynd á umhverfistengdu málin en stefna Framsóknarflokksins segir til um “Árangur áfram – ekkert stopp!”.  Ekki get ég samt sagt að ég sé voðalega lukkuleg með kosningarúrslitin, minn flokkur kom engum þingmanni að og ég lít ekki á atkvæði honum gefið sem ónýtt atkvæði, það hafði sitt að segja með endanlega útkomu kosningana, að fella núverandi valdhafa. Við ætlum ekkert að pakka og kveðja.  Frekar munum við minna á umhverfistengdu málin sem og önnur mál utanþings og halda í heiðri það sem við höfum staðið fyrir í stefnu Íslandshreyfingarinnar – lifandi land. 

Fyrir mitt leyti langar mig að þakka fyrir kosningarbaráttuna og öllum þeim móttökum sem minn flokkur fékk.  Við erum komin til að vera og bara rétt að byrja.  

 

Athugasemdir

[Stefán Einar Stefánsson (IP-tala skráð) 13.5.2007 kl. 16:39]

Bíddu nú við. Er það ekki ruddaskapur gagnvart kjósendum að tala um að stjórnarmeirihlutinn hafi verið "felldur" þegar meirihluti nýrra þingmanna tilheyrir einmitt þessum stjórnarmeirihluta.

[Lilja Haralds (IP-tala skráð) 13.5.2007 kl. 19:53]

Ha?  Féll stjórnin?

Þú veist eitthvað meira en við hin 

[Sigurlín Margrét Sigurðardóttir, 13.5.2007 kl. 21:35]

Er það ekki orðin fastur punktur að þó maður vinni þá er það alltaf íhaldið sem er ofaná?  Í mínum augum kl. 11 í morgun þegar þetta var sett inn var hún fallinn, allavega var þessi flokkur exBjé orðin hauslaus og hana nú!

[Óttarr Makuch, 13.5.2007 kl. 23:04]

Þetta myndi ég flokka sem mjög svo ábyrgðarlaust tal svo ekki sé nú meira sagt og alls ekki bloggaranum til framdráttar. 

[Sigurður Þórðarson, 14.5.2007 kl. 08:57]

Mér finnst bæði Stefán og Óttar dálítið uppskrúfaðir að skamma Sigurlínu svona.  Ég minni á að Fréttablaðið var með tvær forsíður á sunnudaginn á annari (dreift í 43.000 eintökum) var stjórnin fallin en á hinni var sagt að sjórnin rambaði sem var réttara.  

Það tekur því ekki að vera í fýlu.  Samfylking og Framsókn unnu "varnarsigur", jafnvel Íslandshreyfingin hrósar happi.  Gott að allir eru ánægðir.                                               
Það er dálítið fyndið að ef Framsókn hefði fengið 11 atkvæðum meira hefði hreyfing farið í gang sem hefði skilað Frjálslyndum 5 þingmönnum og stjórnin hefði fallið. Þetta stafar af því að jöfnunarmenn eru ekki nógu margir til að jafna atkvæðavægi.   Sjálfur viðurkenni ég hreinskilningslega að ég hefði kosið að vera áfram með vinkonu minni Sigurlínu í flokk og fella stjórnina.

[Sigurlín Margrét Sigurðardóttir, 14.5.2007 kl. 12:12]

Þakka þér Sigurður.  Þið tveir eigið ekkert að vera að skamma mig, það er sjaldan sem ég leyfi mér að vera aðeins kærulaus, þó ekki sé nema 5 mínútur hérna í skrifunum.  Svakalega hafa þessar 5 mínútur ögrað ykkur tveim. 

Til Lilju Haralds:  Stundum veit ég meira en þið, en í gær var radarinn minn á OFF, í dag er hann á ON, svo maður veit aldrei hvað hann nemur.

Svo núna er bara að sjá hvort málin mín tvö, táknmál og textun komast í stjórnarsáttmála næstu ríkisstjórnar.   Maður má nú láta sig dreyma aðeins, einhverju væri þá allavega áorkað ef svo yrði.

[Lilja Haralds (IP-tala skráð) 14.5.2007 kl. 13:41]

Það styð ég 100%, táknmálið og textun.  Með allri þessari tækni sem til er, ætti ekki að vera mikið mál að hafa fítus sem kveikti á texta við íslenskt efni.

Táknmálskennsla finnst mér ætti að standa öllum til boða, en í sannleika sagt er ég ekki viss um að nóg vitund sé í þjóðfélaginu um málið.  Mig hefur alltaf langað að læra og fyrir mörgum árum (ansi mörgum, nota bene) ætlaði ég að drífa mig og hringdi til að fá upplýsingar um námskeið.  En af því ég er ekki heyrnarskert og enginn í kringum mig, skildi manneskjan ekki af hverju ég vildi gera þetta og sagðist ekki halda að það væri neitt slíkt til boða fyrir "utanaðkomandi", ef svo má að orði komast.

Ætti þessi kennsla ekki bara að vera í barnaskóla?  Spáðu í hvað það væri þá miklu minna ónæði í kennslu á öllum skólastigum; í staðinn fyrir mas gætu nemendur tjáð sig án orða 

[Sigurður Þórðarson, 14.5.2007 kl. 14:36]

 Ég held að það hafi haft mikil áhrif til góðs að Sigurlín var á þingi þó það hafi, því miður, ekki verið lengi.  Ég er ekki frá því að textun hafi eitthvað aukist en eins ætti að vera hægt að vera með táknmálstúlk (mynd í mynd) þegar mikilvægir atburðir gerast. 

Sigurlín, þú ert ekki ein um að láta þig dreyma, það gerir lífið bærilegra. Þess utan var ríkisstjórnin fallinn mestalla nóttina.  Ef við og 9 aðrir hefðum kosið Framsókn hefði hún fallið.   Ath!   Ég er samt ekki að mæla með því í framtíðinni.

[Óttarr Makuch, 14.5.2007 kl. 22:51]

Ég var alls ekkert að skamma þig Sigurlín mín, þú mátt pústa eins og allir aðrir, enda er það bara eðlilegt.  En hinsvegar þarf ég ekki að vera sammála því og leyfði mér þess vegna að skrifa athugasemd.  En hvað niðurstöður kosninganna varðar þá get ég ekki verið annað en sáttur þar sem Sjálfstæðisflokkurinn var sigurvegari kosninganna eins og Vinstri Grænir.  Það er sjaldan sem stjórnarflokkar með 16 ára stjórnarsetu bæta við sig fylgi svo um munar og þar með töldum þremur þingmönnum.  Glæsilegur árangur það.

En hvað varðar fréttablaðið þá lýsir þetta nú kannski best vinnubrögðunum á þeim bænum.