Ég er líka sek

Ég er líka bullandi sek eins og Össur.  Satt best að segja tók hjartað mitt aukaslag þegar ég las pistil Össurar um 150 þúsund króna styrkinn hans til aldraðra heyrnarlausra vegna farar þeirra á Norrænt mót aldraðra sem haldið er í Svíþjóð og er að vanda alltaf á 2 ára fresti.  Það var ég sem gaukaði þessu að Össuri og það var ríkuleg ástæða að baki.  Össur Skarphéðinsson alþingismaður hafði hjarta og innsýn inn í málefni aldraðra heyrnarlausra sem hafa lifað sitt líf hér eins og annar hver íslendingur og skilað sínu til landsins í einangrun ef svo má að orði komast. 

Nær allir aldraðir heyrnarlausir eru ómenntaðir og hafa unnið verkmannavinnu eða þá ólaunaða húsmæðravinnu og þar með uppskorið lítið sem ekkert í lífeyrissjóð og fá þar af leiðandi litlar bætur því þau hætta sjálfkrafa að vera öryrkjar eftir 67 ára aldur og missa þar með örorkubætur.  Þetta umrædda fólk telur ekki fjölmennan hóp en hefur þekkt hvort annað frá barnsaldri. 

Á tveggja ára fresti fara þau til Norðurlandanna og hitta þar með aðra aldraða heyrnarlausra á móti því sem þau fara núna.  Þau fara aldrei í neinar Spánarferðir eins og margir aldraðir heyrandi íslendingar gera.  Þau safna frekar fyrir þessu móti í tvö ár og mikil tilhlökkun ríkir hjá þeim fyrir hvert mót og þau koma hress og endurnærð af samskiptalegum mætti til baka.  Smálitur á lífið þeirra.   

Þau verða að hafa túlk með sér og það er eitt sem íslensk stjórnvöld hafa ekki viljað gera þ.e það að greiða fyrir íslenskan táknmálstúlk í öðru landi.  En það gera hinsvegar aðrar norðurlandaþjóðir þ.e. Svíar greiða fyrir heyrnarlausra Svía sænskan táknmálstúlk á erlendir grundu og norðmenn líka o.s.frv.  Við íslendingar verðum að láta okkur það lynda að greiða sjálf úr eigin vasa eða betla hjá þeim t.d. hagsmunasamtökum okkar  fyrir túlkinn ellegar stelast í túlkana frá hinum sem er alls kostar ekki rétt að gera.  

En aftur að kjarna málsins, af hverju sagði ég Össur frá þessu af því að hann sýndi málefnum aldraðra heyrnarlausra einskæran áhuga og kom meðal annars með fyrirspurn til heilbrigðisráðherra um hvað hafi verið gert til að styrkja stöðu aldraðra heyrnarlausra hérlendis. Fyrirspurnin var gerð vorið 2007.  Svarið var að ekkert hafði verið gert svo vitað væri að hálfu ráðuneytisins. 

Ég hafði frétt að 8 aldraðir heyrnarlausir færu á mótið í Svíþjóð og Félag heyrnarlausra ætlaði að borga túlkakostnaðinn. Ég kom þessu að Össur í þeirri von að hann gæti e.t.v. komið einhverju til leiðar í málinu og e.t.v. styrkt og ég gerði mér fullljóst að málefni þetta heyrði ekki undir ráðuneyti hans og lét hann vita það líka.  Hann tók vel í það og innan 10 daga frá þessu var búið að ákveða að styrkja túlkakostnaðinn um 150 þúsund frá iðnaðarráðuneytinu og 150 þúsund frá forsætisráðuneytinu.  Ég gladdist mjög við þessari ákvörðun og sendi póst á Össur og Geir forsætisráðherra og þakkaði þeim af alhug.  Ef einhverju bruðli á peningum iðnaðarráðuneytisins á að klína á Össur þá má alveg klína því á mig líka, það var ég sem byrjaði að suða fyrir einangraðan fámennan hóp íslendinga. Ég er því bullandi sek líka.

En til upplýsinga fyrir þá sem ekki vita þá borgar það land sem heyrnarlausir eru frá túlkinn fyrir þá til fara á ráðstefnur, mót eða fundi í öðru landi.  Allstaðar er það gert á Norðurlöndum og því sjálfsagt mál nema hér á Íslandi.  Þetta þarf að laga hérlendis. Hefði það verið gert, þá hefði ég ekki séð mig knúna að gera þetta og valda fréttastofu truflun í gúrkutíð.  

 

Athugasemdir

[Svanur Heiðar Hauksson, 29.7.2007 kl. 13:52]

Magga mín! Það þarf oft að suða svo réttlætinu sé framfylgt þú átt heiður skilið fyrir þitt suð. Haltu þínu striki.

[Halla Rut , 29.7.2007 kl. 20:13]

Er ekki búið að ræða þetta í mörg ár. Man ekki betur en að þetta hafi verið mikið til umræðu fyrir ca. 2 árum. Þetta á að vera sjálfsagður hlutur. Það á ekki að þurf að sækja um þetta og grenja þetta út. Þetta á að vera eins sjálfsagt og að ráðherrar ferðist um á SagaClass. Af hverju þurfa fatlaðir allaf að suða allt út sem eru sjálfsögð mannréttindi þeirra.

[Sigurlín Margrét Sigurðardóttir, 29.7.2007 kl. 22:23]

Blessuð Halla!  Jú, það er búið að ræða þetta í mörg ár, ekkert nýtt sossum að málefni heyrnarlausra séu margrætt fram og til baka án þess að nokkuð sé gert af viti.

og

Nei sko, bara sjálfur Svanur mættur á bloggið, velkominn kv. M

[Sigurður Bogi Sævarsson (IP-tala skráð) 30.7.2007 kl. 21:28]

Sigurlín Margrét! Þú ert ekki sek. Miklu frekar og án nokkurs vafa raunar, áttu heiður skilinn fyrir að vekja athygli á hagsmunum og þörfum þessa litla og einangraða hóps, sem á allt gott skilið og samfélagið allt hefur skyldur gagnvart. Enginn sem þig þekkir efast um vilja þinn til að koma góðu til leiðar, um það sannfærðist ég þegar ég tók viðtal við þig í DV fyrir mörgum árum. 

Kveðja,

Sigurður Bogi Sævarsson