Páskar

Páskar eru á næsta leyti.  Börnin komin í sitt páskafrí.

Páskar eru góðir, og góður tími fyrir smáfrí frá erill dagsins. Mér hefur alltaf fundist sjarmi yfir þeim þegar kemur að pólverjum og páskahefðum þeirra.  Pólverjar leggja meira úr páskum en jólum.  Þeir senda páskakveðjukort, rétt eins og við gerum með jólakortin.  Á páskadagsmorgun skunda þeir í páskamessuna og hafa með sér svokallaða páskakörfu, í hana er búið að setja margskonar góðgæti og skreyta með fallegum páskalitum og skrauti.  Góðgætið er allskonar matarkyns en egg eru undirstaðan, þar gæti einnig verið að finna brauð og pólskar pylsur líka, jafnvel mola af góðgæti og páskaskreytingu.   Þegar í kirkjuna er komið að morgni þá er karfan sett á borð í anddyri kirkjunnar og eftir messuna tekur maður einhverja körfu með sér heim og ber það sem í henni var til viðbótar á páskaborðið þegar fólk sest er að snæðingi eftri kirkjuferðina.  Það skemmtilega við þetta er að maður veit ekkert hvað er í páskakörfunni sem maður tók með sér heim, oftast eru það börnin sem hafa veg og vanda að því að skreyta körfuna. 

Einn pólskur páskaréttur er í uppáhaldi hjá mér og er hann borin fram á páskadagsmorgun, eiginlega nokkurskonar brunchréttur. 

Undirstaðan í honum er egg og piparrót.  Ég ætla að gefa ykkur uppskrifitina hérna: 

 

Pólskur eggjaréttur (ég veit ekki nafnið á þessum rétti en ég er viss um að hann ber eitthvað nafn) 

Uppskriftin er fyrir 4.

 

6 harðsoðin egg

 

1 dós hrein jógurt

1 dós 18% sýrður rjómi

Piparrótarmauk (fæst í kjörbúðum og er í rauðum umbúðum)

½ gul papirka

2 stiklar vorlaukar (græni hlutinn)

 

Kælið eggin og skerið í tvennt, raðið þeim á fat eða djúpan disk með guluna uppi, dreifið smásalti yfir eggin og látið liggja á meðan sósan er útbúin. 

 

Hrærið saman jógurtina og sýrðan rjómann, bætið saman við piparrótarmaukinu (smekks atriði hve mikið og hve sterkt, ég set frekar meira en minna mmmm) 

 

Hellið blöndunni yfir eggin, látið líta fallega út. 

 

Skerið gulu papirkuna mjög smátt og græna hlutann af vorlaukinn líka.  Dreifið þessu yfir sem skaut á egginn og sósuna.  Berið fram á borðið og hafið heitar pólskar pylsur með, Kielbaza heita þær, þær eru soðnar í vatni, ein og hálf pylsa á mann er hæfilegt. (Jafnvel hægt að nota aðrar pylsur með t.d. Chorzo sem eru ítalskar og þær eru steiktar á pönnu). Hafið brauð við höndina og drekkið te með.  Verði ykkur að góðu!

  

Athugasemdir

[Björn Heiðdal, 1.4.2007 kl. 15:07]

Ekki gleyma að drekka vodka með.  Pólverjar drekka vodka með öllu.  Svona eins og við drekkum malt og appelsín.

[Bragi Einarsson, 1.4.2007 kl. 16:07]

mmmm, hvar finn ég pólskar pylsur?

[Sigurlín Margrét Sigurðardóttir, 1.4.2007 kl. 23:00]

Bj0rn:  Já, þetta með vodkað er rétt, alltaf fínt að hella í sig í Póllandi en geri maður það hérna heima tekur viku að ná hrollinum úr sér og þá er ég bara að tala um hrollinn:)

Bragi:  Það er hægt að fá pólskar pylsur í Bónus og Hagkaup, líka FK- íslensk framleiðsla reyndar man ekki hvað fyrirtæki framleiðir þær og eru þær alveg ágætar á bragðið, grófar við tönn.   Svo má líka bæta smátt skornum radísum við ofan á sósuna og eggin. 

[Björg F (IP-tala skráð) 5.4.2007 kl. 03:26]

Mig langar líka til þess að prófa pólska páska.. er nokkuð föstudagurinn langi jafn hundleiðinlegur hjá þeim og hjá okkur?

[Björg K. Sigurðardóttir, 9.4.2007 kl. 12:16]

Þetta er sniðug hefð með páskakörfurnar. Svo líst mér líka vel á þessa dressingu sem höfð er með eggjunum. Ætla að prófa þetta einhvern tímann.

[Sigurður Þórðarson, 10.4.2007 kl. 23:24]

Takk fyrir uppskriftina. Ég var að prófa þetta og það tóks bara nokkuð vel.     Nema með þessa pólsku pylsur, sem ég keypti í FK sem mér finnst of feitar fyrir minn smekk.   Þær voru ljósar man ekki nafnið kannski hef ég ekki verið með rétta tegund?

[Jóhanna Magnúsar- og Völudóttir , 11.4.2007 kl. 13:14]

Verð að prófa þetta einhverntímann!