Eftirmálin

Mér hefur verið hugsað til hryllings um hvernig meðferðarúrræði fyrir Breiðuvíkurdrengina voru viðhöfð.  Ljótleikinn sem þeir urðu fyrir í allri sinni mynd sem birts hefur okkur undanfarna daga í fjölmiðlum hryllir mig eins og marga aðra í þjóðfélaginu.  Svo mikill er hryllingurinn að mál þetta hefur verið rætt á ríkisstjónarfundi og borgarstjórinn í Reykjavík hefur óskað eftir upplýsingum frá félagsmálayfirvöldum.

Undirtónninn í þessum málum á þessum tíma hvað varðar stjórnvöld hefur verið eitthvað á þessa leið:  “Við borgum þér fyrir að sinna þeim, okkur kemur ekkert við hvernig þú gerir það, notaðu bara þínar aðferðir og kenningar sem þú telur best tilfallnar”.  Eitthvað svona í þá áttina kemur mér til að hugsa um hvaða viðhorf stjórnvalda var við líði á þessum tíma gagnvart svona börnum sem enginn vissi hvað gera átti almennilega við.  Eftirmáli þessara viðhorfa kemur núna í bakið á okkur og það er alveg greinilegt að eitthvað verður að gera í svona málum þegar svona illa tókst til og kenningar og meðferðir sem drengirnir í Breiðuvík þurftu að þola voru með öllu tilgangslausar. 

 

Nokkuð svipað viðhorf virðist líka hafa verið ríkjandi með Byrgið. Einhver var bara svo góður að vilja sjá um nokkra erfiða einstaklinga, en það brást eins og við vitum núna.

 

Heyrnarlausu börnin í heimavistinni þurftu líka að þola sitt og hvað, kynferðisofbeldi og niðurlægingu við að þeim var ekki trúað á raunastundu.  Til viðbótar þessu fengu þau grunnskólaskyldu sinni ekki fullnægt og við tók strjált og stopult framhaldsnáms sem í raun skilaði þeim engu því enginn var grunnurinn fyrir framhaldsnám og táknmáli hafði verið útihýst í grunnskólamenntun þeirra .  Táknmáli sem var þeirra bjargvættur í grunn- og framhaldsnámi.  En svo var ekki því á þessum tíma var uppi sú kenning sem í daglegu tali er nefnd oralstefnan (talmálsstefnan)  og hún byggðist á að kenna þeim að tala og talmál var aðalkennslumálið sem auðvitað gekk ekkert.  Sem betur fer er allt annað viðhorf í þessum málum ríkjandi í dag en eftir situr stór hópur heyrnarlausra sem á sér enga viðreisnar von um að vera samkeppnisfær á atvinnumarkaði vegna lélegrar menntunar.  Þeim líður líka illa og í hjörtum þeirra og huga er sár sem aldrei mun gróa að fullu.

 

Í umræðum á Alþingi í gær þegar fjallað var um Breiðuvíkurmálið kom fram að við ættum að líta til annarra landa í svona málum til dæmis Noregs og Svíþjóðar, fórnarlömbum þarlendis í álíka svipuðum sporum og Breiðuvíkurdrengirnir höfðu verið greiddar skaðabætur fyrir meðferðina á sér sem í öllum tilfellum var óréttlát.   Ég get ekki annað en fagnað að nú sé komið inn í þessa umræðu að samfélagið ætti að þessum einstaklingum skuld að gjalda.  Ég vona að unnið verði að heillindum og festu að finna viðunnandi lausn á þessu máli. 

 

Í morgun fékk ég sent sms-skilaboð frá þolanda kynferðisofbeldis í heimavist heyrnarlausra, það snart mig og auðvitað átti það fullan rétt á sér að munað verði eftir þeim þegar málefni Breiðuvíkurdrengana verða leyst.  Það var svona með leiðréttri íslensku og stöfun:  “Hæ, þeir fá góð og jákvæð viðbrögð Breiðuvíkurstrákarnir með fyrirheit um fébætur og allt en hvað um mig og aðra úr heimavistarmartröðinni? Kv  ….. ;-( “

Ég lofaði að koma þessu á framfæri og finnst rétt að gera það hérna því heyrnarlausir virðast eiginlega svo oft gleymast í hringiðu annara stærri mála sem í raun eru ekkert stærri en þeirra þegar upp er staðið.  Ég get líka alveg bætt við þetta að mér finnst að samfélagið skuldi heyrnarlausum líka sitt vegna ónýttrar grunnskólamenntunar og stopullar framhaldsmenntunar. Um það fjallaði ég hérna í þessum pistilli.

  

Athugasemdir

[Katrín Snæhólm Baldursdóttir, 7.2.2007 kl. 14:09]

Takk Sigurlín Margrét. að tala máli þeirra sem voru rænd máli sínu. Mér finnst þú algerlega standa uppúr og vera gera vel.Vonandi verður vel og rétt tekið á þessum ljótu málum og að samfélagið í heild sinni taki saman höndum og leiðrétti óréttlætið og meiðslin sem þessi börn urðu fyrir.

[Guðrún Magnea Helgadóttir, 7.2.2007 kl. 16:36]

Hvernig væri að utanaðkomandi aðilar rannsökuðu,,Geirfinnsmálið" loksins? En íslensk stjórnvöld hafa hingað til stungið öllu varðandi sannleikann í því sóðamáli undir stól. Sendi slóðina, http://mal214.googlepages.com

[Haukur Nikulásson, 7.2.2007 kl. 22:48]

Þessi mál fylla mann depurð. Maður getur rétt ímyndað sér hversu ömuleg þessi tilvera hlýtur að vera. Börn setja allt sitt traust á fullorðna og þau sem lenda í níðingum bera þess aldrei bætur. Þetta er sá hluti mannlegs eðlis sem er einna ógeðfelldastur.

[Elsa (IP-tala skráð) 7.2.2007 kl. 23:41]

Vá merkilegur lestur á Geirfinnsmálinu, mér kæmi ekki á óvart að hvert orð þarna væri sannleikur, svo mikið rugl hefur þetta mál verið frá upphafi. Mér þykir þó verst að þeir sem öllu ráða hér á landi komi í alvöru svona fram við fólk og stingi málum undir stól. Þetta ættu sem flestir að lesa.

[Elías Halldór Ágústsson, 13.2.2007 kl. 22:09]

Það segir sitthvað um Geirfinnsmálið að það var rannsakað sem morðmál löngu áður en Geirfinnur var lýstur látinn. Það var hins vegar ekkert sem benti til þess að hann væri látinn, hvað þá myrtur.