Galli í gjöf .....

Þá er það komið á hreint að Síminn vissi fyrirfram af þessum möguleika eða ætti ég að segja gróðamöguleika Motorola sem fylgdi gjöfinni, það kemur allavega fram í svari Hjálmars Gíslasonar starfsmanns Símans í athugasemdakerfinu við síðustu færslu.  Ég vil taka það skýrt fram að þessi gjöf er góðra gjalda verð en það kemur nú fyrir á bestu bæjum að galli fylgi gjöfum svona rétt eins og gjöf hins fræga Njarðar hver sem hann nú var eða er.

Mér er hinsvegar spurn hvar  fulltrúi Póst-og fjarskiptastofnunar hafi verið staddur þegar gjöfin kom til tals fyrst á skrifstofum Símans.  Í lögum um Póst og fjarskiptastofnun 2003 nr.69 í 3.gr. um verkefni stofnunnar lið 4.e segir:  "tryggja hag notenda, þ.m.t. einstakra þjóðfélagshópa, svo sem öryrkja, sem best að því er varðar val, verð og gæði".  Eða kom þetta þeim ekkert við þar sem einkafyrirtæki var bara að gefa gjöf?  Gjöf sem fyrirtækið átti eftir að innheimta gjöld af þegar fram liðu stundir?

Eftir sem áður finnst mér svolítið súrt í broti að fyrirtæki eins og Síminn sem hefur meðal annars styrkt íslenskt mál skuli gefa íslenskum táknmálsnotendum síma með erlendri valmynd. Mitt sjónarhorn á þessu er að táknmálsnotendur eru enn og aftur látnir greiða íslenskuna dýru verði.  Fyrst í menntunarsögu þeirra þar sem íslenskan var þeim þungur baggi að eiga við þegar táknmálið var bannað og margir bera sár þessa tímabils enn í dag. Og nú þurfa þeir að borga tvöfalt fyrir sms-skeyti með íslenskum stöfum ella bara sleppa íslenskum stöfum til að spara og hafa íslenskuna bjagaða.  

Íslensk valmynd hefði því átt að eitt af aðalmálinu þegar gjöfin kom til tals fyrst.  Mér er sagt að markmið Símans með gjöfinni hafi aðallega verið að táknmálsnotendur geti talað á sínu máli sín á milli í myndsímtali.  Það var hugurinn að baki gjöfinni en samt sem áður og þrátt fyrir það munu táknmálsnotendur halda áfram að senda jafnmörg sms-skilaboð og áður.  

Íslenskir táknmálsnotendur hafa í mörg ár barist fyrir því að stjórnvöld viðurkenni táknmálið og að táknmálinu verði gerður sá heiður að njóta sama jafnræðis og íslenskan er nú í þjóðfélaginu. Bæði málin hefðu þá átt að vera með í gjöfinni.

 

Athugasemdir

[Heimir Lárusson Fjeldsted, 25.9.2007 kl. 14:58]

Ljótt ef satt er.

[Magnús Viðar Skúlason, 25.9.2007 kl. 19:20]

Ég veit ekki betur en að allir þurfa að greiða "tvöfalt" eins og þú kemst að orði fyrir að nota séríslenska stafi í SMS-skeytasendinginum, sem og íbúar Ungverjalands, Pakistan, Búlgaríu, Rússlands sem og annarra landa sem eru með staftákn sem eru ekki í hinu alþjóðlega stafrófi. Að auki er þetta ekki bundið við Motorola-farsíma, heldur alla farsíma sem eru með SMS-stuðning sem og stuðning við íslenska stafi, hvort sem þeir heita Nokia, Sony Ericsson, Samsung, Sancolux eða eitthvað annað.

Fyrir mína parta að þá nota ég ekki séríslenska stafi í skeytasendingum heldur nota ég tákn á borð við 'th' í staðinn fyrir 'þ' og 'd' í staðinn fyrir 'ð'. Það er mitt val og hefur það ekki valdið neinum marktækum misskilningi í samskiptum mínum í gegnum tíðina.

Enn og aftur, hvort sem að valmyndin sé á ensku eða íslensku þá hefur það ekkert með það að gera þó svo að skilaboðið skiptist upp í 2 skilaboð þegar séríslensk tákn eru notuð. Frekar væri að taka þetta mál upp á vettvangi Alþingis eða þingi Evrópusambandsins, þar sem hægt væri að setja leiðbeinandi reglur um þetta, heldur en að vera að amast í Símanum með þetta mál. Ekki fundu þeir upp GSM-staðalinn, ekki fundu þeir upp SMS-skeytasendingar.

[krossgata, 25.9.2007 kl. 22:32]

Það er lítið vitað um hver gallinn var á gjöf Njarðar og ekki er heldur alveg ljóst hver þessi Njörður var.  http://www.visindavefur.hi.is/svar.asp?id=5730